Atlántico Diario

Guerra ve 'unha oportunidade industrial' na intención de Siemens de fabricar en Galicia compoñentes para eólica mariña

O conselleiro de Economía e Industria, Javier Guerra, confirmou o interese da multinacional Siemens de fabricar compoñentes para aeroxeneradores no mar en Galicia e afirmou que se trata dunha 'oportunidade industrial importante' para a comunidade.

En resposta a preguntas dos xornalistas tras presentar unha guía de aforro enerxético, Guerra explicou que na reunión mantida este luns polo presidente da Xunta, Alberto Núñez Feijóo, e el mesmo con responsables de Siemens en España e en Galicia a empresa formulou a posibilidade de inverter en Galicia. 'Hai boas condicións para fabricar eólica mariña', indicou o conselleiro.

En calquera caso, o proxecto será analizado con maior detalle nunha nova reunión que Guerra tiña previsto convocar este martes. A Xunta e Siemens estudarán as posibilidades de inversión para fabricar aeroxeneradores en Galicia, unha comunidade que rexeitou a implantación de muíños nas súas costas.

Galicia está 'no camiño da recuperación do liderado eólico', manifestou e sostivo que hai 'know how', fábricas e capacidade loxística para esta tecnoloxía, que se está a implantar en países como os do norte de Europa.

Así mesmo, o titular de Economía e Industria destacou o interese do Goberno galego polas enerxías renovables e citou proxectos en estudio como a posibilidade de instalar xeradores en vivendas individuais e as oportunidades do coche eléctrico para devolver á rede a enerxía que non consume.